هذه اعزائى قصة زوجين تزوجوا عن حب و ماتوا عن حب
والقصة تبدا بشاب و خطيبته بيحبوا بعض لدرجة الجنون
و اليكم ما يدور بينهم فى كل خروجه ليهم مع بعض
الخطيب : بحبك يا روحى يا قلبى يا حياتى
الخطيبة : و انا كمان
الخطيب : انا لما ببقى معاكى بحس ان الدنيا ملك ايدى
الخطيبة : و انا كمان
الخطيب : انت احلى حاجة فى حياتى
الخطيبة : و انا كمان
الخطيب : مالك ياحبيبتى مبتكلميش ليه
الخطيبة : مكسوفة بقى الله
الخطيب فى نفسه : هى دى اللى حتسعدنى صحيح
و بعد قصة الحب العنيفة دى يا اخوانى تم الزواج السعيد و بعد مرور سنة
الزوج : انت فين يا حببتى انا جيت
الزوجة : انا هنا يا حبيبى فى المطبخ بعملك احلى غدا ممكن تدوقة
الزوج : تسلم ايديك يا عمرى
و يقعدوا يتغدوا يا اخوانى و الشوكة و السكينة مبتفارقش ايدها
الزوج فى نفسه : يا ربى انا اتجوزت ارق انسانة فى الدنيا
و تمر السنييييييييييي ييين يا اخوانى و كالعادة الزوج راجع من شغلة تعبان
الزوج : فين الأكل هو انا حرام مرة ارجع من الشغل الاقى الأكل جاهز
الزوجة : هو انا ايه شغالة عندك ما انا تعبانة طول
النهار فى خدمتك وخدمة عيالك
الزوج : حنبتدى بقى فين الأكل خلينى اكل و اتخمد
و يقعدوا على الغدا اعزكم الله يااخوانى الزوجة
ماسبتش حد من الجيران الا لما جابت سيرته
وكذلك وابل من الشكاوى و الزوج سامع و ساكت
وبيخدها من اصيرة و يقوم و هى لسة قاعدة
بتاكل و يتأملها الزوج و يتحسر فى نفسه حيث اصبح
كرسى السفرة صغير عليها
و يقول الزوج فى نفسه ربنا يريحنى منك بحق جاه
الحبيب و تنظر له الزوجة و كأنما قرأت افكاره
و تقول فى نفسها قاعدة على قلبك يا حبيبى
و ياتى المساء المعتاد
الزوج : انا نازل اقعد على القهوة شوية
الزوجة : يادى القهوة هو انت ترجع من شغلك تتغدا و تنام وبليل تنزل
القهوة دى عيشة تقصر العمر
الزوج : مين ده اللى عيشته تقصر العمر يا ولية دا انتى اللى عيشتك تقصر العمر
الزوجة : انا اللى من يوم ما اتجوزتك ما شفتش معاك يوم عدل
الزوج : احمدى ربنا انتى كنت لاقية حد يجوزك دا انا لاحقتك قبل ما تعنسى
الزوجة : مين دى اللى تعنس خلى الطابق مستور دا انا وخداك اقرع و بكرش
الزوج : اللهم طولك يا روح انا نازل
الزوجة : استنى هات فلوس عشان عايزة ازور ابنك محمد
الزوج : هو انتى كل ما تشوفى خلقتى تقوليلى هات هات هات طب مانيش جايب حاجة
الزوجة : منك لله يا بخيل يا جلدة اصلك حتعيش و تموت و انت بخيل
وينزل الزوج يا اعزائى عضبان و يرزع الباب وراه
و كالعادة تفضل الزوجة تشتم و تلعن اليوم اللى اتجوزته فيه
و بعد شويه يخبط على بابها الجيران
الجيران : يا ام محمد يا ام محمد
الزوجة : ايه ايه فى ايه
الجيران : الحقى ابو محمد كان قاعد على القهوة بيشرب سحلب راح مرة واحدة طب مات
الزوجة : مات يا لهوىىىىى
ويأتى العزاء و يعلو نحيب النسوة المجاملين من الجيران و كذلك الزوجة
الزوجة : يا حبيبى يا سبعى ياجوزى
الجيران : متعمليش كده فى نفسك يا حبيبتى حتموتى روحك
الزوجة: يا اللى ما كنتش حارمنى من حاجة اه يا حبيبى اعيش ازاى من غيرك اه اه اه
( طاخ ) طبت الزوجة ميتة ا عزائى
الجيران : ام محمد ام محمد يا عينى عليكى يا حبيبتى مقدرتش على بعد جوزها
اصيلة ياختى طول عمرك
الظاهر اعزائى و اخوانى ان روح الزوج حسيت بقدوم روحها اليه
الزوج : عايزة ايه منى سبتلك الدنيا جايه ورايا الأخرة كمان
الزوجة : ها حتغلط بقى
و هكذا اخوانى تلاقت روحهما فى عراك كما كانا عيشين على الأرض
اتمنى ان الحكاية تكون حازت على اعجابكم
العرض العادي
